小弟唔識打online game，所以不大了解箇中樂趣，不過最近遇到兩件事，令小弟深信online game一定好好玩。
第一單是發生於早前某深夜，正當小弟正對著家中電腦工作時，隔離屋忽然傳來男屋主的怒吼：「信唔信我剪撚左你！」接著傳來男屋主兒子的哀號：「唔好呀．．．．嗚．．．嗚．．．唔好剪呀！」嘩，莫非男戶主私自為其公子進行宮刑？若沒有適當止血，分分鐘搞出人命，小弟立時再側耳偷聽，這時男戶主再吼道：「你再上網打機，我就即刻剪撚左你條線！」心裡不禁爆出一大個“車”字。
第二單又是某晚深夜，小弟落街時見到大堂有一對母子在對峙，只見該名大概十歲的男童淚流滿面，而母親一面愁容，苦口婆心說道：「我又唔係唔比你去網吧，只不過要你天光前返上黎，你咁都唔肯．．．．」她還未說完，男童便發出震耳怒吼：「我都話左聽日食晏前返啦，你有無聽我講嘢架！」看來現代父母與子女談判，往往是處於極度劣勢，實在叫人徒嘆奈何！
