睇本Place就知小弟生活寒酸，那些人氣博客如甚麼素人天使，其網上地頭滿山滿海都是美食相片，不分中外，充分反映博主天天gathering的多姿多采的中產生活。（小弟對上一次貼的食物相，只不過是大大碟椒鹽瀨尿蝦而已）。
但由於小弟在咸豐年時做過飲食版記者，當年薪酬微薄，那有閒錢四出試食，撰寫的飲食文章其實都是亂來的，問題是有些唔臭米氣的朋友硬是記著小弟此經歷，久不久就來電問小弟那處有好嘢食，有誠意者小弟都代為上開飯易網站亂找資料然後老點之。更離譜是有一名港女OL舊同事，每隔一陣子就會來電問小弟：我今晚約咗舊同學（有時係老友）在旺角（或銅鑼灣，總之一定係旺區）gathering（唔知點解港女OL成日要gathering），有乜地方d嘢好食、又平、招呼又好又坐得耐的。如此要求，你問蔡樣都未必答到你，不過小弟心地好，每次都提供三個選擇：大家樂、大快活、KFC，每次她聽罷都會回敬一句：頂你！早前她又來電查詢，小弟有感之前給予三個選擇太行貨，便加多一個選擇，比足四個：大家樂、大快活、KFC及吉野家，小弟都暗嘆自己實在太好人了。
究竟小弟此舊同事是甚麼心態，明知小弟會亂答，又久不久來電問此低B問題？小弟讀書少，要回答這類涉及容格精神分析理論的問題實在無能為力，想知道答案者，請移玉步請教那些網上通識老師吧。（即是那些在人家博留言：有趣的文章，謝謝分享，再加多自己通識教室條lin的混吉！需知道，四圍留lin衰格的程度拍得住到處留情也！）
哈哈, 吉野家的確係最好選擇，健康又企理，衰在最近單新聞搞臭哂。
下次可比夠五個：McCafe!
以前我成日同朋友去McCafe 打機。
六、七及八個：銀龍、新釗記、大家食。
”唔知點解港女OL成日要gathering” 。。。妙妙妙！
唔知點解港女OL成日要gathering x 2
呢幾間係旺區算係穩膽啦
我會排美心快餐係第一位~
港女的gathering 是用來講人是非，交換港男情報，例如阿冰個冰個結婚在酒樓擺酒巧cheap！
pcheung 需明白，城中筍盤買少見少，港女獨守空幃，何其寂寞，唯有相約三五知己大講是非，一樂也。
“四圍留lin衰格的程度拍得住到處留情也！”
笑死我…….
我自問都係四個選擇嘅常客（與及其他更加價廉物美嘅茶餐廳），但識得唔少女仔朋友，死都唔肯去大x樂同大x活。
至經典嘅理由，係有個好朋友好認真咁同我講，話如果一個女仔肯同男朋友去大xx食，即係話佢已經俾人食咗隻豬，先至會俾人食住，可以咁隨便搵地方食嘢，死未？
同埋，我諗你當年個同事，會唔會好想有人幫佢埋單？
電鋸：option 8重可以分兩個細項：大家食（村村）同大家食（新之食）。重可以加花園餐廳同譚仔添。
靚媽：見咁鬼多人o係酒店擺結婚酒，我好鬼有衝動反其道而行，就係建議邊個邊個搵間屋村酒樓，最多我贊助八音隊做live，唔使播吹o的打音帶！
博主：對於呢位想宣傳易o既網台主持人，我想講：宣傳不易。我o地雖然唔少人對上位既葡萄又暗暗羡慕，但係上位唔係咁上o架，量多料唔足o既留言，弄巧反拙也。
>話如果一個女仔肯同男朋友去大xx食，即係話佢已經俾人食咗隻豬
如此性觀念,真係問天天日報華大夫佢都O咀,亦令小弟想起一個眼神等於性騷擾的妙論
pcheung兄：
查實我都唔知同唔明，點解我個朋友多年來有此堅持，都係搵個地方食餐飯啫，而且拍拖就更加有情飲飽吧。可能這是跟「男朋友送名牌先代表愛我」這類思想有異曲同工之處掛。
不過，公道點說，我個朋友平日言行，100巴仙唔係港女，至今亦無半個名牌袋跟身，只有奶粉袋同尿片袋，好媽媽一名。但就算係老死，佢仍然死都唔肯同我去大xx之類地方食飯。