說教是老師的重要工作之一，但小弟最近才知道原來現在有頗多老師對學生說教時，會說：「你知唔知咁樣做會煩到我架！？」小弟認為此說教句式相當笨實，除了聽落好像老師頗為不負責任，同學亦可以輕易回敬一句：「你煩關我春事？」令老師自討沒趣。
說之以理考工夫，動之以情亦不容易，話說中五時的地理老師是感性大嬸，動輒眼淚汪汪地向同學說教，某次班中的大隻婆米米陳頂撞她，她又含著泡淚對米米陳云：「你再不懂得潔身自愛，難保將來要在夜總會從事一些出賣肉體的勾當！」話猶未了，班中年紀最大的老嘢立即舉手回應：「Miss，話晒我都跟過世叔伯去夜總會，果度d舞小姐邊有米米陳咁大隻呀！」米米陳聽到老嘢此言，立即怒目吼道：「你講乜撚嘢呀！」老嘢立即回敬：「乜撚嘢唔好呀，你估夜總會請小姐去推鉛球呀！（米米陳是校際女子組推鉛球冠軍！）」兩人這樣來回炒蝦拆蟹，結果地理老師捉了他倆到教員室大訓話，我們亦樂得有半堂空堂吃零食或炮馬經矣！當日班中男生更決定要請老嘢午膳，報答他為我們帶來半堂空堂有功也！
